Nanambara ny drafitra hampihenana ny fampiasana fanafody famonoana bibikely amin'ny fambolena voankazo sy legioma ary dite hatramin'ny 10% ao anatin'ny telo taona i Shina.
Olana lehibe ao Shina ny fahapotehan'ny tany sy ny fandotoana ny rano noho ny fampiasana betsaka ny fanafody famonoana bibikely sy ny zezika simika mba hambolena ny voly any amin'ny faritra kely trandrahana mafy.
Mikasa ny hampihena 5% ny fampiasana fanafody famonoana bibikely amin’ny vary, varimbazaha ary katsaka mandritra io fe-potoana io ihany koa ny minisiteran’ny Fambolena sinoa ary hampitombo ny fampiasana zezika organika mitovy habe amin’ny taona 2025.
“Ilaina maika ny fanatsarana ny fahaiza-manao sy ny fampiasana siantifika ny fanafody famonoana bibikely sy ny zezika ary manampy amin'ny fampihenana ny fampiasana fanafody simika,” hoy ny tranokalan'ny minisitera. Etsy andanin’izany, ilaina ny fitandroana ny fanjarian-tsakafo nasionaly sy ny famatsiana vokatra fototra, hoy ny drafitra.
Niezaka ny hamaha ity olana ity i Shina nanomboka tamin'ny taona 2015 tamin'ny alàlan'ny fanentanana hampitsaharana ny fitomboan'ny fampiasana simika amin'ny taona 2020.
Tamin'ny taona 2021, nihena 16.8% sy 13.8% ny fampiasana fanafody famonoana bibikely sy zezika. Na izany aza, nambaran’ny minisitera fa mbola ampiasaina be loatra sy tsy mahomby izy ireo.
Mamporisika ny fampiasana fanafody voajanahary toy ny bibikely ny fitondram-panjakana ary mikendry ny 55% amin’ny velaran-tany hampiasana fomba maitso amin’ny taona 2025.